Ravikiranalu TV

ఎంపీ ఆదాలను కలిసిన విఎస్యు వి.సి సుందరవల్లి

విక్రమ సింహపురి యూనివర్సిటీ వైస్ ఛాన్స్లర్ సుందరవల్లి, రిజిస్ట్రార్ ఎల్ విజయ కృష్ణారెడ్డి, నెల్లూరు ఎంపీ ఆదాల ప్రభాకర్ రెడ్డిని శుక్రవారం కలిశారు. యూనివర్సిటీలో మౌలిక సదుపాయాల కల్పన నిమిత్తం ఎంపీని కలిశారు.

కేంద్ర పథకాల అమలులో నెల్లూరు జిల్లా టాప్ ఎంపీ ఆదాల ప్రశంస

కేంద్ర ప్రభుత్వ నిధులతో రాష్ట్రంలో అమలయ్యే పథకాల్లో నెల్లూరు జిల్లా అగ్రస్థానంలో ఉందని నెల్లూరు ఎంపీ ఆదాల ప్రభాకర్ రెడ్డి ప్రశంసించారు. జిల్లా మౌలిక సదుపాయాల కల్పన సలహామండలి (దిశ) సమావేశం శుక్రవారం కలెక్టరేట్లోని తిక్కన భవన్లో జరిగింది. దీనికి నెల్లూరు ఎంపీ ఆదాల ప్రభాకర్ రెడ్డి అధ్యక్షత వహించారు. కలెక్టర్ చక్రధర్ బాబు, మేయర్ పొట్లూరు స్రవంతి సమక్షంలో జరిగిన ఈ సమావేశంలో ఎంపీ ఆదాల మాట్లాడుతూ 43 అంశాలను ఈ సమావేశంలో సమీక్షించినట్లు తెలిపారు. ప్రతి 3 నెలలకు ఒకసారి జరగాల్సిన ఈ సమావేశం కోవిడ్ కారణంగా గత 6 నెలలుగా జరగలేదని అన్నారు. కేంద్ర ప్రభుత్వ నిధులు ఆయా పథకాల ద్వారా ఏ మేరకు సద్వినియోగం అయ్యాయి, ఇంకే సమస్యలు ఉన్నాయనే విషయం గా సమీక్షించినట్లు చెప్పారు. ముఖ్యంగా ఎన్.ఆర్.ఇ.జి.ఎస్ పనుల్లో కోటి 18 లక్షల పనిదినాలను కల్పించి దేశంలోనే నెల్లూరు జిల్లా మొదటి స్థానంలో నిలిచిందని ప్రశంసించారు. అదేవిధంగా పి.ఎం.ఏ.జి.వై పథకం కింద ఎస్సీ ,ఎస్టీ గ్రామాల్లో మౌలిక వసతుల కల్పనలో జిల్లా రెండో స్థానం సాధించిందని పేర్కొన్నారు. 160 గ్రామాలలో డ్రోన్ ద్వారా సర్వే చేసి జిల్లా దేశంలోనే ముందంజలో ఉందని తెలిపారు. స్వచ్ఛ పర్యవేక్షక ర్యాంకింగ్లో నెల్లూరు నగర పాలక సంస్థ దేశంలోనే మొదటి స్థానంలో నిలిచి 10 కోట్ల రూపాయల నగదు బహుమతిని సాధించడం గర్వించదగిన విషయమని కితాబునిచ్చారు. పీ.ఎం కిసాన్ అమలులో జాతీయ అవార్డు లభించిందని పేర్కొన్నారు. రైతులు రైతు భరోసా మొత్తాలను సకాలంలో అందించడం ద్వారా ఈ అవార్డు దక్కిందని తెలిపారు. కోవిడ్ నివారణ చర్యల్లో కూడా మన జిల్లా ముందంజలో ఉందని పేర్కొన్నారు. ముఖ్యంగా వ్యాక్సినేషన్ లో నెంబర్వన్ స్థానాన్ని సాధించిందని ప్రశంసించారు. వెయ్యి మందికి పైగా ప్లాస్మా చికిత్స అందించామని, కోటి ఎనభై ఐదు వేల మందికి కోవిడ్ చికిత్సను అందించినట్లు తెలిపారు. ఉక్రెయిన్ లో ఉన్న 25 మంది విద్యార్థుల్లో ఇప్పటికే 11 మంది జిల్లాకు చేరారని, మిగతా వారిని కూడా రప్పించేందుకు జిల్లా కలెక్టర్ కేంద్ర ప్రభుత్వంతో సమన్వయం చేసుకొని పనిచేస్తున్నారని తెలిపారు. జిల్లాను పలు పథకాల అమలులో అగ్రస్థానంలో ఉంచిన జిల్లా కలెక్టర్ ఇతర అధికారులకు తన అభినందనలు మనస్ఫూర్తిగా తెలిపారు.డ్వామా ఆధ్వర్యంలో జరిగిన ఈ సమావేశంలో జేసి గణేష్ నాయక్ అధికారులను పర్యవేక్షించారు. ఎంపీ విలేకర్ల సమావేశంలో విజయ డైరీ ఛైర్మన్ రంగారెడ్డి, జడ్పిటిసి మల్లు సుధాకర్ రెడ్డి, మాజీ కార్పొరేటర్ స్వర్ణ వెంకయ్య, పాముల హరి ప్రసాద్, శ్రీధర్ రెడ్డి, నరసింహారావు , మైపాడు అల్లాబక్షు, మధు తదితరులు పాల్గొన్నారు.

రైలు పట్టాలపై అనుమానాస్పద మృతి

దొరవారిసత్రం ...రవికిరణలు.టివి : దొరవారిసత్రం రైల్వే స్టేషన్ సమీపాన నాయుడుపేట వైపు నుండి సూళ్లూరుపేట వైపు వెళ్తున్న రైల్వే ట్రాక్ పై గురువారం పెళ్లకూరు మండలం శిరసనంబేడు గ్రామానికి చెందిన శిరసనంబేడు సురేందర్రెడ్డి(51) అను అతను మృతి చెందాడు రైల్వే పోలీసులు ఎస్ ఐ మాలకొండయ్య వివరాల మేరకు సురేందర్ రెడ్డి నాయుడుపేట నుంచి సూళ్లూరుపేట కి వెళ్తున్న రైల్లో నుండి అన్న పడిపోయి ఉండాలి లేదా రైల్వే ట్రాక్ దాటుతూ ఉన్నప్పుడు రైలు ఢీకొని ఉండాలని తెలుపుతున్నారు మృతుడి మృతదేహాన్ని పోస్టుమార్టం నిమిత్తం సూళ్లూరుపేట ప్రభుత్వాసుపత్రులకు తరలించారు మృతుడికి భార్య కుమారుడు ఉన్నారు కేసు నమోదు చేసి దర్యాప్తు చేస్తున్నట్లుగా సూళ్లూరుపేట రైల్వే పోలీస్ ఎస్ఐ మాలకొండయ్య తెలిపారు

అంగరంగ వైభవంగా శ్రీ గంగా పార్వతి సమేత నాగేశ్వర స్వామి వారి గ్రామోత్సవం

శ్రీ పొట్టి శ్రీరాములు నెల్లూరు జిల్లా. సూళ్లూరుపేట : పట్టణంలో రైల్వే స్టేషన్ వద్ద వెలసియున్న శ్రీ గంగా పార్వతీ సమేత నాగేశ్వర స్వామి వారి గ్రామోత్సవము గురువారం రాత్రి విద్యుత్ దీప, విశేష పుష్ప అలంకరణ, బాణసంచా వేడుకలతో అంగరంగ వైభవంగా నిర్వహించారు.

స్థానిక శాసనసభ్యులు కిలివేటి సంజీవయ్య సారధ్యంలో చెన్నా రెడ్డి సుబ్రహ్మణ్యం రెడ్డి (స్వామి రెడ్డి) ఆధ్వర్యంలో మహా శివ రాత్రిని పురస్కరించుకొని ఐదు రోజుల పాటు ఆలయంలో విశేష పూజా కార్యక్రమాలు ఏర్పాటు చేశారు.

ఈ కార్యక్రమంలో ఛాంపియన్ చంద్రారెడ్డి, కాఫీ రెడ్డి దయాకర్ రెడ్డి, చంద్రమౌళి రెడ్డి, దయాకర్ రెడ్డి, ప్రకాష్ రెడ్డిలు గ్రామ పెద్దలు, భక్తులు భారీగా పాల్గొన్నారు.

తడ బాలికోన్నత పాఠశాలలో ఘనంగా జాతీయ సైన్స్ దినోత్సవ ప్రదర్శనలు

రవి కిరణాలు న్యూస్ తడ: శ్రీ పొట్టి శ్రీరాములు నెల్లూరు జిల్లా తడ మండలం లో జాతీయ సైన్స్ దినోత్సవం పురస్కరించుకొని సోమవారం తడ బాలికోన్నత పాఠశాలలో ప్రధాన ఉపాధ్యాయులు నరసింహారావు ఆధ్వర్యంలో ఘనంగా నిర్వహించారు.

ఈ సందర్భంగా పాఠశాల విద్యార్థిని విద్యార్థులు ఎంతో ఉత్సాహంతో తమ మేధస్సు ప్రతిభతో మిళితం చేసి సైన్స్ ప్రదర్శనలు చేశారు.

పాఠశాల ప్రాంగణంలో సైన్స్ డే పురస్కరించుకుని పలువురు విద్యార్థిని బృందం ప్రదర్శించిన ప్రదర్శనలో వివిధ రకములైన సైన్స్ ప్రదర్శనలు అద్భుతంగా కనపరిచారు వీళ్లందరినీ ప్రధాన ఉపాధ్యాయులు మరియు ఉపాధ్యాయులు మెచ్చుకోవడం జరిగింది
ఈ కార్యక్రమంలో పాఠశాల ఉపాధ్యాయుని ఉపాధ్యాయులు కరుణశ్రీ, సురేఖ, నాగదేవి, రమాదేవి లతోపాటు వివిధ పాఠశాల విద్యార్థిని విద్యార్థులు ఎంతో ఉత్సాహంతో పాల్గొన్నారు.

శ్రీసిటీని సందర్శించిన కేంద్ర కమిటీ

- ఎగుమతి ఉత్పత్తులపై సుంకాలు, పన్నుల సవరణపై సమావేశం

రవి కిరణాలు న్యూస్ ( శ్రీసిటీ) :

ఎగుమతి ఉత్పత్తులపై సుంకాలు, పన్నుల సవరణ (RoDTEP) నిర్ణయ కమిటీ బృందం మంగళవారం శ్రీసిటీని సందర్శించింది. మాజీ కేంద్ర హోం మరియు వాణిజ్య కార్యదర్శి జికె పిళ్లై (రిటైర్డ్ ఐఏఎస్) నేతృత్వంలో రిటైర్డ్ CBEC స్పెషల్ సెక్రటరీ వైజి పరాండే, కస్టమ్స్ మరియు సెంట్రల్ ఎక్సైజ్ చీఫ్ కమిషనర్ (రిటైర్డ్) గౌతమ్ రే కమిటీ సభ్యులుగా సందర్శనకు విచ్చేయగా, వీరితో పాటు కేంద్ర ఆర్థిక మంత్రిత్వ శాఖ అండర్ సెక్రటరీ హసన్ అహ్మద్, డిప్యూటీ DGFT ప్రవీణ్ కుమార్ పర్యటనలో పాల్గొన్నారు. శ్రీసిటీ SEZ మరియు DTZలోని పరిశ్రమల సీనియర్ మేనేజర్‌లతో వీరు పరస్పర చర్చా కార్యక్రమం నిర్వహించారు.

ఈ సందర్భంగా తన గత శ్రీసిటీ పర్యటనలను గుర్తు చేసుకున్న పిళ్లై, తక్కువ వ్యవధిలో సాధించిన పారిశ్రామిక వృద్ధిని ప్రశంసించారు. ఎగుమతులపై సుంకాలు, పన్నులు ఇతర సంబంధిత అంశాలను పరిగణనలోకి తీసుకుని, ఎగుమతులకు RoDTEP రేట్లను నిర్ణయించడానికి ఎగుమతి ఆధారిత పరిశ్రమల అభిప్రాయాలను తమ కమిటీ సేకరిస్తుందని చెప్పారు. పన్నులు మరియు సుంకాల రీయింబర్స్‌మెంట్‌ను సులభతరం చేయడానికి, తమ ఉత్పత్తుల ధరలను నిర్దేశిత ఫార్మాట్‌లో ఇవ్వాలని ఆయన కంపెనీలకు సూచించారు.

కమిటీకి సాదర స్వాగతం పలికిన శ్రీసిటీ మేనేజింగ్ డైరెక్టర్ రవీంద్ర సన్నారెడ్డి, పరిశ్రమల ప్రతినిధులతో సమావేశమైనందుకు సభ్యులకు ధన్యవాదాలు తెలిపారు. పన్నులు మరియు సుంకాల రీయింబర్స్‌మెంట్‌కు సంబంధించిన అన్ని ప్రశ్నలకు అవసరమైన ఇన్‌పుట్‌లు ఇవ్వాలని మరియు వివరణలు కోరాలని కంపెనీల ప్రతినిధులకు ఆయన విజ్ఞప్తి చేశారు. ఇన్‌పుట్ ఫార్మాట్‌లు, ఇతర నిబంధనలను కంపెనీలు బాగా అర్థం చేసుకునేలా, సబ్జెక్ట్‌పై వెబ్‌నార్‌ను ఏర్పాటు చేయాలని ఆయన కమిటీ ఛైర్మన్‌కు విన్నవించారు.

ఎగుమతుల కోసం RoDTEP రేట్లను నిర్ణయించడానికి మరియు RoDTEP రేట్ల షెడ్యూల్‌కు సంబంధించి లోపాలు లేదా క్రమరాహిత్యాలకు సంబంధించిన సమస్యలపై సిఫార్సులను అందించడానికి వాణిజ్య మంత్రిత్వ శాఖ ఈ కమిటీని ఏర్పాటు చేసింది. ఎగుమతి చేసే పరిశ్రమలు వివిధ కేంద్ర రాష్ట్ర సుంకాలు, పన్నులు మరియు వివిధ స్థాయిలలో ఇన్‌పుట్ ఉత్పత్తులపై విధించిన లెవీల వాపసును నిర్ణయించడానికి కమిటీకి తమ ప్రతిపాదనలను సమర్పించాలని కోరారు.

పర్యటనలో భాగంగా కమిటీ సభ్యులు శ్రీసిటీ పరిసరాలు చుట్టిచూడడంతో పాటు ఫాక్స్‌కాన్, జెన్ లినెన్ ఇంటర్నేషనల్, సిద్ధార్థ లాజిస్టిక్స్, ఆస్ట్రోటెక్ స్టీల్స్ మరియు హెల్తియం పరిశ్రమలను సందర్శించారు.

మేకపాటి గౌతమ్ రెడ్డి గారి పార్థివదేహానికి శ్రీసిటీ ఎండీ రవీంద్ర సన్నారెడ్డి నివాళులు

మేకపాటి పార్థివదేహానికి శ్రీసిటీ ఎండీ స్మృత్యంజలి

రవి కిరణాలు న్యూస్ (శ్రీసిటీ) :

దివంగత రాష్ట్ర పరిశ్రమలు, వాణిజ్య, ఐ.టీ. మరియూ నైపుణ్యాభివృద్ధి శాఖామాత్యులు మేకపాటి గౌతమ్ రెడ్డి గారి పార్థివదేహానికి శ్రీసిటీ ఎండీ రవీంద్ర సన్నారెడ్డి అంజలి ఘటించారు. ఆయనతో తనకున్న అనుబంధాన్ని, ప్రత్యేకించి ఆయన శ్రీసిటీ పారిశ్రామిక అభివృద్ధికి అందించిన సహాయ సహకారాన్ని, పరిశ్రమల యాజమాన్యాలతో తరచూ వీడియో కాన్ఫరెన్స్ ద్వారా సంప్రదిస్తూ... ప్రభుత్వం తరఫున వారికి కావాల్సిన సహాయ సహకారాలు అందించడంలోనూ ఎంతో చొరవ చూపేవారని గుర్తు చేసుకున్నారు. మరీ ముఖ్యంగా కోవిడ్ క్లిష్టసమయంలో పరిశ్రమలు నిరాటంకంగా నడపడానికి ఆయన చూపిన చొరవ మరువలేనిదని అన్నారు. వారం క్రితం జరిగిన దుబాయ్ ఎక్స్పోలో ఆంధ్రప్రదేశ్ తరఫున పెట్టుబడుల కోసం గౌతమ్ రెడ్డి నాయకత్వంలో వెళ్ళిన బృందంలో తాను పాల్గొనవలసి వున్నా కొన్ని అనివార్య పరిస్థితుల కారణంగా హాజరు కాలేక పోయానని అన్నారు. రాష్ట్ర పారిశ్రామికాభివృద్ధికి ఎంతో పాటుబడ్డ గౌతమ్ రెడ్డి, చివరి క్షణం వరకూ రాష్త్రంలో పెట్టుబడులు ఆకర్షించడానికి ఎనలేని కృషి చేశారని అన్నారు. ఆయనలేని లోటు ఎవరు పూడ్చలేనిదని రవీంద్ర సన్నారెడ్డి ఆవేదన వ్యక్తపరిచారు.

గౌతమ్ రెడ్డి గారి తండ్రి శ్రీ మేకపాటి రాజమోహన్ రెడ్డి గారిని పరామర్శిస్తూ, మేకపాటి కుటుంబంతో తనకు ఉన్న సాన్నిహిత్యాన్ని, మరీ ముఖ్యంగా గౌతమ్ రెడ్డితో తనకున్న అనుబంధాన్ని గుర్తు చేసుకున్నారు. ఊహించని ఈ అపార దుఖాన్ని తట్టుకునే శక్తిని ఆ కుటుంబానికి ఇవ్వాలని భగవంతుని ప్రార్థించారు.