కొమ్మిపాడులో ఉత్సాహంగా ‘పల్లె వీక్షణ’.. క్షేత్రస్థాయిలో కలెక్టర్, ఎమ్మెల్యే పర్యటన!
ప్రజా సమస్యల పరిష్కారమే లక్ష్యం: కొమ్మిపాడులో కలెక్టర్ హిమాన్షు శుక్ల, ఎమ్మెల్యే కురుగొండ్ల విస్తృత పర్యటన
కూలీలతో ముచ్చట్లు.. చిన్నారులతో ఆటలు: కొమ్మిపాడు ‘పల్లె వీక్షణ’లో కలెక్టర్, ఎమ్మెల్యే సందడి!
ప్రభుత్వ సంక్షేమ, అభివృద్ధి పథకాలను క్షేత్రస్థాయిలో ప్రజలకు మరింత చేరవేయడమే లక్ష్యంగా సైదాపురం మండలం కొమ్మిపాడు గ్రామంలో "పల్లె వీక్షణ" కార్యక్రమం శుక్రవారం అత్యంత ఉత్సాహంగా సాగింది. జిల్లా కలెక్టర్ హిమాన్షు శుక్ల, వెంకటగిరి శాసనసభ్యులు కురుగొండ్ల రామకృష్ణ జిల్లా అధికార యంత్రాంగంతో కలిసి శుక్రవారం ఉదయం నుండి గ్రామంలో విస్తృతంగా పర్యటించారు. క్షేత్రస్థాయిలో అందుతున్న ప్రభుత్వ సేవలను, అభివృద్ధి పనులను వారు స్వయంగా పరిశీలించి వివరాలు అడిగి తెలుసుకున్నారు.పర్యటనలో భాగంగా కలెక్టర్, ఎమ్మెల్యేలు తొలుత గ్రామ శివారులో జరుగుతున్న జాతీయ ఉపాధి హామీ పథకం పనుల వద్దకు నేరుగా వెళ్లారు. అక్కడ పని చేస్తున్న కూలీలతో మాట్లాడి, వారికి అందుతున్న వేతనాలు, కల్పిస్తున్న వసతులపై ఆరా తీశారు. కూలీలకు ఎలాంటి ఇబ్బందులు కలగకుండా చూడాలని అధికారులను ఆదేశించారు.అనంతరం గ్రామంలోని అంగన్వాడీ కేంద్రాన్ని వారు సందర్శించారు. అక్కడ చిన్నారులతో కాసేపు మమేకమై, ముచ్చటించారు. పిల్లల అభ్యసన సామర్థ్యాలను, రైమ్స్, అక్షరాల గుర్తింపును కలెక్టర్, ఎమ్మెల్యేలు స్వయంగా పరీక్షించి అభినందించారు. కేంద్రంలో పంపిణీ చేస్తున్న పౌష్టికాహారం నాణ్యతను పరిశీలించి, గర్భిణులు, బాలింతలు, పిల్లలకు నాణ్యమైన పోషక విలువలు గల ఆహారాన్ని అందించాలని సిబ్బందికి సూచించారు.స్థానిక రైతు సేవా కేంద్రం (RBK)లో నిమ్మ సాగు చేస్తున్న రైతులతో కలెక్టర్ హిమాన్షు శుక్ల, ఎమ్మెల్యే రామకృష్ణ ప్రత్యేకంగా సమావేశమయ్యారు. నిమ్మ పంట దిగుబడులు, మార్కెటింగ్ ధరలు, శీతల గిడ్డంగుల వసతి, ఎదుర్కొంటున్న సవాళ్లపై రైతులతో సుదీర్ఘంగా చర్చించారు. రైతులకు ప్రభుత్వం తరఫున పూర్తి సాంకేతిక, ఆర్థిక సహకారం అందిస్తామని ఈ సందర్భంగా వారు భరోసా ఇచ్చారు.గ్రామ వీధుల్లో పర్యటిస్తున్న సమయంలో స్థానిక ప్రజలు పలు సమస్యలను కలెక్టర్, ఎమ్మెల్యేల దృష్టికి తీసుకువచ్చారు. ప్రజల నుంచి వచ్చిన అర్జీలు, వినతులపై కలెక్టర్ సానుకూలంగా స్పందించారు. ప్రజా సమస్యలను ఏమాత్రం అలసత్వం వహించకుండా తక్షణమే పరిష్కరించాలని అక్కడికక్కడే అధికారులను ఆదేశించారు.
Post a Comment